Қоғамдық тамақтандыру және сервис колледжі үш жылдық еңбек пен ізденімпаздықтың нәтижесінде оқу орны қабырғасынан мол білім алып, қызықты да қимас сәттерге толы шуақты күндерін өткізіп, болашаққа асқақ армандарын серік еткен шәкірттеріне салтанатты түрде диплом тапсырды. Салтанатты кеш «Rixos President Astana» қонақ үйінде өткізілді. Әлеуметтік серіктес білімгерлерді кәсіби машықтандыру, біліктілік тәжірибесінен өткізу ісінде көш бастап келеді. Сонымен қатар жылма-жыл білім ордасының үздік бітіруші түлектерін жұмысқа орналастыруды да қамтамасыз етуде. Осындай қолдаудың арқасында колледж студенттері «World Skills – Қазақстан» чемпионаттарының, халықаралық түрлі кәсіби байқаулардың жеңімпаздары ретінде танылып жүр. Және де оқу орнының өндірістік оқыту шеберлерінің де тәжірибе жетілдіру орталығы болып саналады.